Rut 4 | NdeIBE | STEP | Kusenjalo uBhowazi waya esangweni ledolobho wahlala lapho. Kwathi isihlobo esihlengayo ayekhulume ngaso sisedlula lapho, uBhowazi wathi, “Woza lapha, mngane wami, uhlale phansi.” Waya kuye wahlala phansi.

Ruth 4

UBhowazi uthatha uRuthe

1 Kusenjalo uBhowazi waya esangweni ledolobho wahlala lapho. Kwathi isihlobo esihlengayo ayekhulume ngaso sisedlula lapho, uBhowazi wathi, “Woza lapha, mngane wami, uhlale phansi.” Waya kuye wahlala phansi.

2 UBhowazi wabiza abadala bakulelo dolobho abalitshumi wathi, “Hlalani lapha,” benza njalo. 3 Wasesithi kusihlobo esihlengayo, “UNawomi osebuyile evela eMowabi uthengisa isiqinti esasingesomfowethu u-Elimeleki.

4 Ngibone kufanele ukuthi ngilethe loludaba kuwe njalo ngicebise ukuthi usithenge phambi kwabo laba abahlezi lapha laphambi kwabadala bakithi. Nxa usihlenga, yenza njalo. Kodwa nxa ungasihlengi, ungazise. Phela kakho olelungelo lokwenza lokho ngaphandle kwakho, besekulandela mina.” Yena wathi, “Ngizasihlenga.”

5 UBhowazi wasesithi, “Mhla uthenga lesosiqinti kuNawomi loRuthe umMowabi, uzazuza lomfelokazi womufi, ukuze umise ibizo lowafayo kanye lempahla yakhe.”

6 Sikuzwa lokho, isihlobo esingumhlengi sathi, “Angingeke-ke ngisihlenge ngoba sekungonakala okwelifa lami. Sihlenge wena ngokwakho. Mina anganelisi.”

7 (Ngalezonsuku zakuqala e-Israyeli, ukuze umkhuba wokuhlenga lokuguqula impahla zisuka komunye zisiya komunye uphelele, oyedwa wayekhupha inyathela lakhe aliphe omunye. Le yayiyindlela yokuqinisa isivumelwano ko-Israyeli.)

8 Ngakho isihlobo esihlengayo sakhupha inyathela laso sathi kuBhowazi, “Sithenge wena.”

9 UBhowazi wasebika ebadaleni lakubo bonke abantu wathi, “Lamhlanje lingofakazi bokuthi sengithengile kuNawomi yonke impahla ka-Elimeleki, loKhiliyoni loMaheloni.

10 LoRuthe umMowabi, umfelokazi kaMaheloni sengimzuzile ukuba abe ngumkami, ukuze kugcinakale ibizo lomufi kanye lempahla yakhe, lokuze ibizo lakhe linganyamalali emulini loba embalini yomuzi. Lingofakazi lamhlanje!”

11 Abadala kanye labo bonke ababesesangweni bathi, “Singofakazi. Sengathi uJehova angenza owesifazana ozayo emzini wakho abe njengoRasheli loLeya, bona abakha indlu ka-Israyeli. Sengathi ungahlonitshwa e-Efratha ube lodumo eBhethilehema.

12 Ngenzalo uJehova azakunika yona ngalo owesifazana, sengathi imuli yakho ingaba njengekaPherezi, uThamari ayizalela uJuda.”

Uluhlu lwenzalo kaDavida

13 UBhowazi wamthatha uRuthe waba ngumkakhe. Wembatha laye, uJehova wenza wakhulelwa, wasezala indodana. 14 Abesifazana bathi kuNawomi: “Kadunyiswe uJehova, yena ongakutshiyanga wasala ungelasihlobo esihlengayo. Sengathi angaba lodumo kulo lonke elako-Israyeli! 15 Uzakwenza impilo yakho ibentsha akulonde ebudaleni bakho. Ngoba umalokazana wakho, yena okuthandayo njalo ongcono kulamadodana ayisikhombisa, usemuphe inzalo.”

16 UNawomi wasethatha umntwana, wamgona, wamondla. 17 Abesifazana ababehlala lapho bathi, “UNawomi uselendodana.” Bamutha ibizo bathi ngu-Obhedi. Wayenguyise kaJese, ozala uDavida.

18 Lesi yiso isizukulwana sikaPherezi: uPherezi wayenguyise kaHezironi,

19 uHezironi enguyise kaRama, uRama enguyise ka-Aminadabi,

20 u-Aminadabi enguyise kaNashoni, uNashoni enguyise kaSalimoni,

21 uSalimoni enguyise kaBhowazi, uBhowazi enguyise ka-Obhedi,

22 u-Obhedi enguyise kaJese, uJese enguyise kaDavida.